Գյումրի համայնքի ղեկավար Վարդգես Սամսոնյանն ընդունել է Շվեդիայի տեղական իշխանությունների և տարածաշրջանների ասոցացիայի ներկայացուցիչ Հելլե Վիլյումսեին և ծրագրի ավագ ղեկավար Վարսենիկ Մնացականյանին: Հանդիպմանը ներկա են եղել Գյումրի համայնքի ղեկավարի գլխավոր խորհրդական Հայկ Սուլթանյանը, ծրագրերի և արտաքին կապերի բաժնի պետ ժ/պ Նազելի Էլբակյանը:
Ընկերությունը ծավալում է աշխատանքներ՝ Հայաստանում տեղական համայնքների զարգացման բարեփոխումներին խթանելու ուղղությամբ: Վարդգես Սամսոնյանն իր խոսքում կարևորել է հյուրերի այցը Գյումրի, ապա ընդգծել, որ Գյումրու կայուն զարգացմանն ու տեղական ինքնակառավարման բարձրացմանն ուղղված հանձնառությանը համահունչ՝ ձեռնամուխ են լինում համայնքի զարգացման ռազմավարության ձևավորմանը: Ռազմավարության առաջնային նպատակը՝ քաղաքային միջավայր և քաղաքացիական տարածք ստեղծելն է, որը կօգտագործի համայնքի և նրա բնակիչների ներուժը:
Համայնքի ղեավարը նաև ընդգծել է, որ կցանկանային համագործակցել և ստանալ ՍԱԼԱՐ Ինթերնեշնլի տեխնիկական աջակցությունը՝ ռազմավարական զարգացման գործընթացներում։
Ընկերության պատասխանատուները պատրաստակամություն են հայտնել համագործակցության, ընդգծել են, որ կուսումնասիրեն մինչ այս համայնքի կողմից իրականացված աշխատանքները, կաջակցեն համայնքի զարգացման ռազմավարության մշակման գործընթացներում: