articles/20260205_104956_1.jpg
Փետրվարի 2-ից 5-ը տեղի ունեցավ Հայաստանի կառավարության բարձրաստիճան պաշտոնյաների ուսումնայցը Ստոկլհոլմ։Այցը կազմակերպվել է Հայաստանի ապակենտրոնացման և տեղական ինքնակառավարման բարեփոխումների աջակցման (ԴեաԼոԳ) ծրագրի շրջանակում։
Ուսումնայցի նպատակն էր ծանոթանալ Շվեդիայի կրթության ապակենտրոնացման փորձին և տեղական ինքնակառավարման դերակատարմանը կրթական և այլ ծառայությունների կառավարման և մատուցման գործընթացում, ինչպես նաև իրականացվել են այցելություններ համայնքներ և դպրոցներ՝ կրթության կառավարման մոդելների, պատասխանատվությունների բաշխման և որակի ապահովման մեխանիզմների վերաբերյալ արժեքավոր պատկերացումներ ձեռք բերելու նպատակով։
Կառավարական պատվիրակության կազմում էին Տարածքային կառավարման և ենթակառուցվածքների նախարարության (փոխնախարար Ավետիք Դարբինյան և տեղական ինքնակառավարման քաղաքականության վարչության պետ Աշոտ Գիլոյան), Կրթության, գիտության, մշակույթի և սպորտի նախարարության (փոխնախարար Արաքսյա Սվաջյան և ընդհանուր և արտադասարանական կրթության քաղաքականության մշակման և վերլուծության վարչության պետ Անուշ Լալազարյան) և Ֆինանսների նախարարության (փոխնախարար Վահան Սիրունյան) բարձրաստիճան պաշտոնյաներ, ինչպես նաև Երևանի քաղաքապետ Տիգրան Ավինյանը։
Ուսումնայցի ընթացքում մասնակիցները հանդիպումներ ունեցան Շվեդիայի կառավարության և պետական կառույցների բարձրաստիճան ներկայացուցիչների հետ՝ այդ թվում Շվեդիայի Ֆինանսների նախարարության և Արտաքին գործերի նախարարության ղեկավար կազմի ներկայացուցիչների հետ, ինչպես նաև այցելեցին Շվեդիայի խորհրդարան։ Այցի շրջանակում ծանոթացան Ստոկհոլմի քաղաքային կառավարման և կրթության համակարգին՝ հանդիպելով Ստոկհոլմի քաղաքային խորհրդի նախագահին և կրթության ոլորտի պատասխանատուներին։ Բացի այդ, իրականացվեցին այցելություններ համայնքներ և կրթական հաստատություններ՝ կրթության կառավարման մոդելների, պատասխանատվությունների բաշխման և որակի ապահովման մեխանիզմների վերաբերյալ արժեքավոր փորձ և պատկերացումներ ձեռք բերելու նպատակով։
Ուսումնայցը հնարավորություն տվեց ձեռք բերել արժեքավոր պատկերացումներ Շվեդիայի ապակենտրոնացման համակարգի և գործնական մոտեցումների վերաբերյալ՝ նպաստելով Հայաստանում տեղական ինքնակառավարման բարեփոխումների շարունակական ամրապնդմանն ու զարգացմանը։