Քաղաքական երկխոսության և բարեփոխման աջակցություն
Շվեդիայի Տեղական իշխանությունների և
տարածաշրջանների ասոցիացիայի (SALAR) դուստր կազմակերպությունը՝ SALAR International-ը, DeaLoG ծրագրի միջոցով կարևոր դեր է խաղում Հայաստանում ապակենտրոնացման բարեփոխման առաջմղման գործում՝ աջակցելով կառուցողական քաղաքական երկխոսության ձևավորմանը և իրականացնելով ռազմավարական գործողություններ, որոնք ուղղված են բարեփոխման աջակցմանը:
Շվեդիայի միջազգային զարգացման համագործակցության գործակալության՝ Sida-ի ֆինանսավորմամբ DeaLoG ծրագիրը ստեղծում է հնարավորություն բարեփոխման շահառուների և դերակատարների համար ներգրավվել առարկայական քննարկումներում՝ նպաստելով արդյունավետ և ներառական ապակենտրոնացման քաղաքականության ձևավորմանը։
Ծրագրի հիմնական նպատակներից է նաև տրամադրել ռազմավարական խորհրդատվություն և աջակցել ՀՀ տարածքային կառավարման և ենթակառուցվածքների նախարարության (ՏԿԵՆ), ինչպես նաև այլ ներգրավված պետական մարմինների կարողությունների զարգացմանը։
Ծրագիրը կարևորում է տեղական ինքնավարության և հաշվետվողականության նշանակությունը՝ խրախուսելով այնպիսի բարեփոխումներ, որոնք կընդլայնեն տեղական ինքնակառավարման մարմինների լիազորություններն ու կզարգացնեն նրանց կարողությունները՝ ավելի մեծ պատասխանատվություն ստանձնելու համար։
Մեկ այլ կարևոր գործառույթ է բարձրացնել ապակենտրոնացման առավելությունների վերաբերյալ իրազեկվածությունը թե՛ բոլոր շահառու կողմերի, թե՛ հասարակության լայն շերտերի շրջանում՝ վերլուծական նյութերի, թիրախային խորհրդատվական նախաձեռնությունների և այլ միջոցառումների միջոցով։
Հենվելով տեղական ինքնակառավարման ոլորտում Շվեդիայի երկարամյա փորձի վրա՝ SALAR-ի գործունեությունը, որն ուղղված է ապակենտրոնացման քաղաքականության շուրջ երկխոսության և բարեփոխումների աջակցությանը, նպաստում է Հայաստանում թափանցիկ, ներառական և քաղաքացիների կարիքներին համահունչ ապակենտրոնացված կառավարման մոդելի ձևավորմանը։